گندم کی فصل کی بہتر نگہداشت کے لیے محکمہ زراعت سیالکوٹ کی سفارشات
سیالکوٹ، محکمہ زراعت سیالکوٹ نے گندم کی فصل کی دیکھ بھال کے لیے اہم سفارشات جاری کی ہیں تاکہ فصل کی بہتر پیداوار کو یقینی بنایا جا سکے۔
آبپاشی کے رہنما اصول
ترجمان کے مطابق دھان، کماد، مکئی، اور کپاس کے بعد کاشتہ گندم کی فصل کو دوسرا پانی 80 سے 90 دن بعد دیا جائے، جبکہ پچھیتی کاشت کے لیے دوسرا پانی 70 سے 80 دن بعد گوبھ کے وقت فراہم کریں۔ آبپاشی سے قبل محکمہ موسمیات کی پیش گوئی کو مدنظر رکھنا ضروری ہے۔ اگر پہلی آبپاشی میں تاخیر ہو جائے تو فوری طور پر پانی فراہم کریں۔
کھاد کے استعمال کی ہدایات
آبپاش علاقوں میں نائٹروجنی کھاد پہلے اور دوسرے پانی کے ساتھ مکمل کریں، جبکہ ریتلی زمینوں میں کھاد چھوٹے وقفوں میں استعمال کریں تاکہ اس کا اثر برقرار رہے۔
جڑی بوٹیوں کی تلفی
ترجمان نے کاشتکاروں کو ہدایت دی ہے کہ پہلے پانی کے بعد جڑی بوٹیوں کی شناخت کر کے محکمہ زراعت کے ماہرین کے مشورے سے چوڑے اور نوکیلے پتوں والی جڑی بوٹیوں کے خاتمے کے لیے زرعی زہروں کا اسپرے کریں۔ اسپرے کے لیے ٹی جیٹ یا فلیٹ فین نوزل کا استعمال کریں اور پانی کی مقدار 100 سے 120 لیٹر رکھیں۔ دھند، بارش، اور تیز ہوا کے دوران اسپرے کرنے سے گریز کریں تاکہ مؤثر نتائج حاصل ہوں۔
